Novas

27-12-2019 -

Concerto de Nadal de María do Ceo na Liga de Amigos de Barallobre

A cantante María do Ceo actúa este sábado, ás 20 horas, no local da ACRD Liga de Amigos de Barallobre. No concerto, dirixido a todos os públicos e con entrada libre, a artista portuguesa interpretará fados, panxoliñas e cancións do seu último disco "Cancións para nenas e nenos". Trátase dunha iniciativa da Rede de Dinamización Lingüística-Secretaría Xeral de Política Lingüística no marco do programa "Nadal en Rede". 
27-12-2019 -

O Gran Pedrini trae á Casa da Cultura o seu espectáculo “Coas mans na maxia”

O Concello de Fene porá este luns 30 de decembro o broche de ouro á programación cultural do ano 2019 con maxia. O Gran Pedrini ofrecerá no salón de actos da Casa da Cultura o seu espectáculo “Coas mans na maxia”, a partir das 12 horas e dirixido a un público familiar. A entrada é libre e de balde ata completar aforo.
27-12-2019 -

Máis de 500 persoas tomarán parte na Carreira e Andaina de San Silvestre de Fene

Un total de 529 persoas inscribíronse na Carreira e Andaina de San Silvestre que celebrará este sábado 28 de decembro o Concello de Fene. Será polas rúas do municipio, con percorridos que oscilan, segundo a idade, entre os 100 e os 5 kms. En todo c caso, arrancará ás 16,30 horas da casa consistorial, cun marcado espírito festivo. Na carreira absoluta anotáronse 275 atletas, namentras que nas categorías menores están apuntados 151, e a andaina contará con 103 participantes.
26-12-2019 -

XIX Festival de Panxoliñas este domingo na Igrexa Grande de Maniños

A Igrexa Grande de Maniños acollerá este domingo 29 de decembro o XIX Festival de Panxoliñas. Unha cita prevista inicialmente para a pasada fin de semana, pero que foi aprazada por mor da alerta vermella. Así, retomarase este domingo a partir das 20 horas.
26-12-2019 -

A programación cultural de Nadal continúa este venres con O Libro Máxico e a proposta Rock entre pais e fillos

O salón de actos da Casa da Cultura de Fene acollerá este venres 27 de decembro o espectáculo “O Libro Máxico”, dirixido a un público familiar e infantil de entre 5 e 10 anos. Incluído na programación cultural municipal, a edil de área, Rocío Bértoa, sinala que a función dará comezo ás 12 horas con entrada libre e de balde ata completar aforo.Ademais, pola tarde, a partir das 19 horas e no local social do CCRD de Perlío, celebrarase o concerto Rock entre pais e fillos.
23-12-2019 -

Baobab Teatro trae este xoves á Casa da Cultura de Fene a súa obra “Puño Puñete”

O salón de actos da Casa da Cultura de Fene acollerá este xoves 26 de decembro, a partir das 12 horas, a función “Puño Puñete”, a cargo de Baobab Teatro. Dirixida a un público familiar e infantil de entre 1 e 9 anos, a entrada é libre e de balde ata completar o aforo. Incluída na programación cultural de Nadal deseñada pola Concellería de Cultura que dirixe Rocío Bértoa, propón unha viaxe a través das palabras e da música, rescatando ditos populares, refráns, poemas, lerias e enredos.
23-12-2019 -

Últimos días para anotarse na Carreira e Andaina de San Silvestre de Fene

O Concello de Fene celebrará este sábado 28 de decembro a Carreira e Andaina de San Silvestre. Será polas rúas do municipio, con percorridos que oscilan, segundo a idade, entre os 100 e os 5 kms. En todo caso, arrancará ás 16,30 horas da casa consistorial, cun marcado espírito festivo, a participación é gratuíta para todas as categorías de menores e de 2 euros para a carreira absoluta. As persoas interesadas en anotarse teñen de prazo ata mañá martes, ás 23,59 horas.
20-12-2019 -

Suspendidas todas as actividades culturais e deportivas dependentes do Concello de Fene durante o período de alerta vermella

Perante as condicións meteorolóxicas adversas (alerta vermella por fenómenos costeiros e vento) previstas para esta fin de semana, o alcalde de Fene, Gumersindo Galego, vén de publicar un Bando Municipal de Urxencia no que se anuncia a suspensión de "todas as actividades culturais e deportivas dependentes do Concello durante o período de alerta vermella (sábado dende as 14.00 horas)". Tamén se informa do "peche do Cemiterio Municipal durante a tarde do día 21 de decembro do 2019" e do peche ao público de pavillóns deportivos, pistas deportivas e pía municipal a partir das 14.00 horas do sábado. 
20-12-2019 -

Nenas e nenos xa poden depositar as súas cartas para os Reis Magos no buzón real instalado na casa consistorial

No día de hoxe, os paxes dos Reis Magos instalaron na casa consistorial de Fene un buzón real para que as nenas e nenos do municipio poidan depositar as súas cartas. Nesta liña, o Concello anima aos máis pequenos a escribir as súas peticións e desexos e entregar as misivas xa que, nos próximos días, serán recollidas polos mesmos paxes para a súa entrega aos Reis Magos.
20-12-2019 -

A Igrexa de Maniños será escenario este sábado do XIX Festival de Panxoliñas

As citas musicais de Nadal continuarán este sábado 21 de decembro na Igrexa Grande de Maniños. A partir das 20 horas, o templo será escenario do XIX Festival de Panxoliñas. Con entrada libre e aforo limitado, tomarán parte no mesmo o Tradicoro, Rondalla Perla del Río, Coral Eterna Xuventude, Coral Polifónica Agarimo de Sillobre, Coral Polifónica de San Valentín, Coral Polifónica O Pote e Rondalla Estrelecer.